محکمہ اطلاعات حکومت سندھ کی جانب سے فلم اور ڈرامہ انڈسٹری سے وابستہ افراد کی معاونت کا فیصلہ کرتے ہوئے فلمز اینڈ ڈرامہ پراڈکشن بورڈ قائم کر دیا گیا ہے۔
سندھ کابینہ کے منظوری کے بعد محکمہ اطلاعات حکومت سندھ کی جانب سے فلم اور ڈرامہ پراڈکشن بورڈ کا قیام عمل میں لایا گیا۔ سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن کی زیر صدارت اہم اجلاس میں بورڈ کے قیام کا فیصلہ کیا گیا۔ اجلاس میں سکریٹری اطلاعات ندیم الرحمان میمن، ڈائریکٹر ایڈورٹائزمنٹ محمد یوسف کابورو، سارنگ لطیف چانڈیو اور دیگر نے شرکت کی۔
اجلاس کے موقع پر بات کرتے ہوئے سندھ کے سینئر وزیر شرجیل انعام میمن نے کہا کہ نیا تشکیل دیا جانے والا بورڈ فلم اور ڈرامہ پراڈکشن اور اس شعبے سے منسلک لوگوں کی معاونت کرے گا اور ثقافتی نمائندگی و تخلیقی صلاحیتوں کو فروغ دینے کے لئے کردار ادا کرے گا۔
انہوں نے کہا کہ بورڈ کے تحت فلم اور ڈرامہ انڈسٹری سے وابستہ افراد کی حوصلہ افزائی کے لئے ان کی معاونت کی جائے گی۔
سینئر وزیر شرجیل انعام میمن نے کہا کہ حکومت سندھ صوبے کے گوناں گوں کلچر اور ہمہ گیر تاریخی تہذیب کو اجاگر کرنے کی خواہاں ہے، محکمہ اطلاعات کی جانب سے نئے ٹیلنٹ کے فروغ کے لئے اقدامات کئے جا رہے ہیں، فلم اور ڈرامہ کے توسط سے پاکستان خاص طور پر سندھ کے اندر مثبت سوچ کو فروغ دینے کی ضرورت ہے۔
انہوں نے کہا کہ سماجی برائیوں کے روک تھام اور ان کے منفی اثرات کے خاتمے کے لئے سول سوسائٹی اور آرٹسٹوں کے ساتھ ساتھ تمام مکتبہ فکر کے لوگوں کو کردار ادا کرنا ہوگا۔
شرجیل انعام میمن نے کہا کہ میڈیا انڈسٹری کو درپیش چیلنجز کو سامنے رکھتے ہوئے میڈیا انڈسٹری کے مزید معاونت کی ضرورت ہے، محکمہ اطلاعات تمام وسائل کو بروئے کار لاتے ہوئے لوگوں تک مثبت سوچ اجاگر کرنے کے لئے کردار ادا کرتا رہے گا۔
