کراچی
م
قائم مقام گورنر سندھ سید اویس قادر شاہ نے روضہ مبارک پر چادر چڑھا کر عرس کا باضابطہ افتتاح کیا
کراچی قائم مقام گورنر سندھ سید اویس قادر شاہ نے منگل کے روز کراچی کے معروف روحانی مرکز حضرت عبداللہ شاہ غازیؒ کے 1295ویں سالانہ عرس مبارک کی افتتاحی تقریب میں شرکت کی جب کہ چیف ایڈمنسٹریٹر اوقاف فرخ شہزاد قریشی نے قائم مقام گورنر کا استقبال کیا اس موقع پر سید اویس قادر شاہ نے روضہ مبارک پر چادر چڑھائی، فاتحہ خوانی کی اور ملک و ملت کے امن، ترقی اور خوشحالی کے لیے خصوصی دعا مانگی اور زائرین سے ملاقات کی اور ان کے لیے کیے گئے انتظامات کا جائزہ لیا۔ اس موقع پر اظہار خیال کرتے ہوئے قائم مقام گورنر سندھ سید اویس قادر شاہ نے کہا کہ بزرگانِ دین کی تعلیمات انسانیت، امن، بھائی چارے اور روحانی تطہیر کا سرچشمہ ہیں۔ حضرت عبداللہ شاہ غازیؒ جیسے عظیم صوفی بزرگوں نے اپنی تعلیمات اور کردار سے معاشرے میں محبت، رواداری اور اخوت کو فروغ دیا جن پر آج کے دور میں عمل پیرا ہونا ہماری اجتماعی ضرورت ہے۔ انہوں نے مزید کہا کہ سندھ حکومت اولیاء کرام کے مزارات پر آنے والے زائرین کے لیے سہولیات کی فراہمی کو اپنی اولین ترجیح سمجھتی ہے۔ محکمہ اوقاف اور دیگر متعلقہ ادارے زائرین کو بہتر، محفوظ اور باوقار ماحول فراہم کرنے کے لیے ہمہ وقت سرگرم عمل ہیں۔ انہوں نے مزید کہا کہ حضرت عبداللہ شاہ غازیؒ کا عرس ایک روحانی اجتماع ہے جو مختلف طبقہ ئے فکر کو متحد کرتا ہے۔ انہوں نے کہا کہ سندھ صوفیوں، درویشوں اور اہلِ دل کا خطہ ہے جہاں ہمیشہ محبت، برداشت اور خدمتِ خلق کی قدریں پروان چڑھتی رہی ہیں۔
