جہاں بجلی نہیں پہنچی وہاں سولر فراہم کئے جائیں گے، ناصر شاہ کا اعلان

کراچی صوبائی وزیر توانائی، ترقیات و منصوبہ بندی سید ناصر حسین شاہ نے کہا ہے کہ جہاں بجلی نہیں پہنچی وہاں سولر فراہم کئے جائیں گے، بلاول بھٹوزرداری کا وژن ہے کہ ہر ایک کو بجلی دی جائے۔ یہ بات انھوں نے آج عبداللہ رند گوٹھ منگھوپیر ٹاون میں بجلی فراہمی کی افتتاحی تقریب سے خطاب کرتے ہوئے کہی ۔ اس موقع پر پیپلزپارٹی کے رکن قومی اسمبلی شاہدہ رحمانی، منگھوپیر ٹاون کے چئیرمین نواز علی بروہی سمیت پیپلزپارٹی کے دیگر رہنما موجود تھے۔ تقریب سے خطاب کرتے ہوئے کہا کہ عبداللہ رند گوٹھ منگھوپیر ٹاون قیام پاکستان سے قبل کی آبادی ہے لیکن بجلی سے محروم رہی ہے اور عبداللہ رند گوٹھ میں 450 سے زائد گھر ہیں جنہیں پہلی مرتبہ کے الیکٹرک کے ذریعے بجلی فراہم کی جارہی ہے۔ انھوں نے کہا کہ کوشش کر رہے ہیں جو سہولیات ہیں وہ ہر جگہ پہنچائی جائے، یہاں سے قریب سولر پارک بن رہا ہے۔ انھوں نے کہا کہ دو لاکھ سولر سسٹم کی تقسیم شروع ہوچکی ہے جبکہ 5 لاکھ سولر سسٹم دینے کی اسکیم رواں سال شروع ہوگی اور جہاں بجلی نہیں پہنچی وہاں سولر فراہم کئے جائیں گے۔ صوبائی وزیر نے کہا کہ سولر پارک کیلئے کوشش کریں گے کہ مقامی لوگوں کو ٹیکنیکل تربیت دے کر روزگار دیا جائے تاکہ روزگار کے مواقع ملیں۔ انھوں نے کہا کہ سستی بجلی سے کراچی کے شہریوں کو فائدہ ہوگا جو گاؤں ریگولائز ہونے ہیں اس پر کام ہورہا ہے۔ انھوں نے کہا کہ چئیرمین بلاول بھٹوزرداری چاہتے ہیں گھروں کے مالکانہ حقوق گھر کے خواتین کے پاس ہوں۔ انھوں نے کہا کہ صنعتیں بھی بہت ضروری ہیں لیکن لوگوں کو بجلی فراہم کرنا اولین ترجیح ہے، یہ بھلائی اور روشنی کا سفر ہے ہر گاؤں تک بجلی پہنچائیں گے۔ آخر میں انھوں نے درگاہ پر چادر چڑھائی اور ملک میں امن قائم ہونے کی دعا کی۔
محمد شبیہ صدیقی
ڈائریکٹر انفارمیشن/ڈائریکٹر میڈیا مینجمنٹ
وزیر توانائی اینڈ پی اینڈ ڈی سندھ